Anëtari i Kryesisë së Partisë Demokratike, Gligels Muçollari, ka reaguar në lidhje me mbërritjen në portin e Durrësit të një anijeje me 102 kontejnerë që dyshohet të përmbajnë mbetje toksike. Këta kontejnerë u sekuestruan nga Prokuroria e Durrësit, ndërkohë që Muçollari ka bërë thirrje për transparencë në hetim.
Në një deklaratë për mediat, theksoi rëndësinë e një hetimi të hapur dhe publik, duke kërkuar që testimi i mbetjeve të kryhet në prani të mediave, publikut dhe ekspertëve ndërkombëtarë. Ai shtoi se sipas të dhënave të rrjetit të Bazelit në Tajlandë, mostrat e marra nga dheu pranë kontejnerëve kanë treguar rezultate alarmante toksike dhe përmbajnë lëndë të rrezikshme.
“Përsërisim kërkesën për testim transparent të mbetjeve dhe në sytë e medias, publikut dhe ekspertëve ndërkombëtarë,” deklaroi Muçollari, duke shtuar se PD do të ndjekë nga afër çështjen dhe nuk do të lejojë që e vërteta të fshihet.
