Avokati i Popullit ka nisur një hetim administrativ lidhur me mënyrën e arrestimit të ish-presidentit Ilir Meta. Për këtë arsye, është kërkuar informacion pranë Policisë së Shtetit për procedurat e ndjekura për zbatimin e masës së sigurisë “arrest me burg”. Avokati i Popullit ka detyrën të vlerësojë respektimin e të drejtave të njeriut nga Policia e Shtetit gjatë kryerjes së ndalimit apo arrestimit të çdo individi.
Edhe pse procedura e ndalimit të ish-presidentit ishte një akt i shëmtuar dhe i panevojshëm, Avokatit të Popullit i është dashur plot një javë për të vendosur nisjen e hetimit. Ndoshta, mandati i përfunduar prej dy vitesh i Erinda Ballancës e ka bërë pak dembel institucionin e drejtuar prej saj. Përndryshe, është e vështirë të kuptohet pse ky hetim është nisur pikërisht sot, kur episodi i shëmtuar i Policisë së Shtetit nuk është më në qendër të vëmendjes së publikut, i cili tani kërkon më shumë informacion për dosjen dhe akuzat sesa për mënyrën e ndalimit të Ilir Metës.
Kryetarja e institucionit të Avokatit të Popullit nuk ka qenë shumë aktive në raste të ngjashme të ndalimeve të qytetarëve të thjeshtë. Ndoshta ndjeshmëria e rritur për ish-presidentin vjen për faktin se ajo është zgjedhur në këtë post me votat e LSI-së, ose për arsye të tjera që e lidhin atë me Metën dhe persona të tjerë të përfshirë në dosje, të cilët kanë shprehur shqetësime të ngjashme me ato të zonjës Ballanca.
