Shqipëria pritet të përfshihet këtë javë nga një tjetër valë e fortë e të nxehtit afrikan, e cila do të sjellë temperatura mbi 40 gradë Celsius në disa zona të vendit.
Sipas parashikimeve të sinoptikanëve, e mërkura pritet të jetë dita më e nxehtë e javës, me termometrin që në zona të caktuara mund të arrijë deri në 42 gradë Celsius në hije.
Elbasani dhe Berati pritet të regjistrojnë temperaturat më të larta, ndërsa vlera shumë të larta do të shënohen edhe në Tiranë dhe në pjesën më të madhe të ultësirës perëndimore.
Nxehtësia do të ndihet jo vetëm gjatë ditës. Edhe temperaturat minimale pritet të rriten ndjeshëm, duke bërë që netët të mbeten të nxehta dhe të ofrojnë pak freski.
Temperaturat ekstreme rrisin gjithashtu rrezikun për përhapjen e zjarreve. Për këtë arsye, qytetarëve u kërkohet të tregojnë kujdes të shtuar dhe të shmangin çdo veprim që mund të shkaktojë vatra zjarri, veçanërisht përdorimin e pakujdesshëm të materialeve apo lëndëve të ndezshme.
Moti gjatë kësaj jave të gushtit do të dominohet nga kthjellimet, ndërsa nuk parashikohen reshje shiu.
Një lehtësim i vapës pritet gjatë fundjavës, kur temperaturat mund të pësojnë një rënie me rreth 4 deri në 5 gradë Celsius. Megjithatë, moti do të vijojë të mbetet tipik veror dhe me temperatura të larta.
