Në përvjetorin e 80-të të bombardimit atomik të Hiroshimës, një nga të mbijetuarit e asaj tragjedie, Toshiyuki Mimaki, ka përcjellë një mesazh të fortë kundër armëve bërthamore dhe kërcënimeve që vazhdojnë të rëndojnë mbi botën edhe sot.
Toshiyuki Mimaki, sot 83 vjeç, ishte vetëm tre vjeç kur më 6 gusht 1945, Shtetet e Bashkuara hodhën bombën e parë atomike mbi qytetin e Hiroshimës. Ai është një nga zërat më të fuqishëm në lëvizjen globale për çarmatimin bërthamor dhe fitues i Çmimit Nobel për Paqen në vitin 2024, si përfaqësues i organizatës Nihon Hidankyo.
Në një intervistë të publikuar nga “Sky News”, Mimaki theksoi se rreziku bërthamor nuk është zbehur, përkundrazi:
“Tani është epoka më e rrezikshme. Rusia mund ta përdorë një armë bërthamore, Kina mund ta përdorë, Koreja e Veriut po ashtu. Dhe presidenti Trump? Nuk po shohim ndryshim.”
Ai kujton momentet e tmerrshme të asaj dite, edhe pse ishte ende fëmijë:
“Nuk dëgjova shpërthim. Thjesht një shkëndijë si vetëtimë. Pasdite, njerëzit nisën të dilnin – të djegur, me rroba të grisura, disa pa këpucë, të gjithë kërkonin ujë.”
Bombardimi atomik i Hiroshimës shkatërroi rreth dy të tretat e qytetit dhe vrau mbi 70 mijë persona menjëherë. Vetëm tre ditë më pas, një tjetër bombë u hodh mbi Nagasaki. Deri në fund të vitit 1945, numri i të vdekurve nga të dy qytetet arriti në rreth 210 mijë. Efektet e rrezatimit vijojnë të ndihen edhe sot, ndërsa shumë nga të mbijetuarit jetojnë me pasoja të rënda fizike dhe psikologjike.
Mimaki, tashmë bashkëkryetar i Nihon Hidankyo – shoqata kombëtare e të mbijetuarve të bombave atomike – i bën thirrje botës të mos harrojë dhe të mos lejojë përsëritjen e tragjedisë:
“Vazhdimisht e kemi thënë: një botë pa luftë, pa armë bërthamore. Por askush nuk dëgjon. Mesazhi im është i qartë: nuk duhet të krijojmë më kurrë një Hibakusha-n.
