Një marrëveshje e arritur mes Mbretërisë së Bashkuar dhe Francës për kthimin e emigrantëve që kalojnë Kanalin e La Manshit me anije të vogla ka hyrë në fuqi ditën e sotme, bëri të ditur Ministria e Brendshme britanike. Marrëveshja është rezultat i negociatave mes kryeministrit britanik Keir Starmer dhe presidentit francez Emmanuel Macron, të zhvilluara muajin e kaluar. Teksti përfundimtar u nënshkrua nga të dy qeveritë javën e kaluar.
Sipas marrëveshjes, emigrantët që mbërrijnë në brigjet britanike dhe që konsiderohen të papërshtatshëm për azil mund të ndalohen dhe të kthehen në Francë. Në këmbim, Britania e Madhe do të pranojë një numër të barabartë emigrantësh nga Franca, të cilët do të kenë mundësinë të aplikojnë për azil përmes një platforme online. Prioritet do t’u jepet shtetasve nga vende me rrezik të lartë për trafikim dhe personave që kanë lidhje familjare në Britani.
Sipas të dhënave zyrtare, mbi 25,000 emigrantë kanë kaluar Kanalin me gomone deri në fund të korrikut të këtij viti – shifër rekord për këtë periudhë të vitit. Qeveria britanike është përballur me rritje të ndjeshme të tensioneve të brendshme dhe protestave, ku në disa raste demonstratat jashtë hoteleve që strehojnë kërkues azili janë përshkallëzuar në dhunë. Kryeministri Starmer ka theksuar se marrëveshja përfaqëson një arritje të rëndësishme diplomatike në përpjekjet për menaxhimin e kufijve dhe emigracionit.
Megjithatë, marrëveshja ka nxitur kritika në të dy anët e Kanalit. Disa zyrtarë francezë e kanë quajtur skemën tepër të favorshme për Britaninë, ndërsa partia e djathtë ekstreme britanike Reform UK, e udhëhequr nga Nigel Farage, e ka konsideruar të pamjaftueshme për mbrojtjen e kufijve kombëtarë.
Në vijim të masave për të ndaluar emigracionin e parregullt, qeveria britanike ka njoftuar se promovimi në rrjetet sociale i rrugëve të rrezikshme të kalimit të Kanalit do të konsiderohet vepër penale. Projektligji për sigurinë kufitare, i cili po shqyrtohet aktualisht në Parlament, parashikon që individët që reklamojnë apo nxisin këto kalime të paligjshme të mund të ndëshkohen me gjoba dhe deri në pesë vjet burg.
Sipas një analize të Ministrisë së Brendshme britanike, rreth 80% e emigrantëve që kanë mbërritur me anije të vogla kanë deklaruar se janë orientuar përmes rrjeteve sociale gjatë gjithë procesit të kalimit.
