Një zyrtar i lartë i Kombeve të Bashkuara ka paralajmëruar për “pasoja katastrofike” nëse Izraeli zgjeron operacionet ushtarake në Rripin e Gazës, pas raportimeve se Kryeministri izraelit Benjamin Netanyahu po shtyn për një riokupim të plotë të territorit.
Zëvendës Sekretari i Përgjithshëm i OKB-së, Miroslav Jenča, tha para Këshillit të Sigurimit se një veprim i tillë do të ishte “thellësisht shqetësues” dhe mund të rrezikojë jetën e më shumë palestinezëve, si dhe të pengjeve izraelite që mbahen nga Hamasi.
Mediat izraelite raportojnë se Netanyahu do të zhvillojë këtë javë një takim me kabinetin e sigurisë për të diskutuar planin, i cili synon “pushtimin e plotë të Rripit të Gazës dhe mposhtjen e Hamasit”, sipas një zyrtari të lartë izraelit që foli në kushte anonimiteti.
Kabineti i sigurisë, që pritet të mblidhet të enjten, duhet të japë miratimin për një veprim të tillë. Disa e kanë interpretuar këtë plan si një taktikë negociuese për të ushtruar presion ndaj Hamasit pas dështimit të fundit të bisedimeve për armëpushim, ose si një përpjekje për të forcuar mbështetjen nga aleatët e ekstremit të djathtë të Netanyahut.
Ndërkohë, presioni ndërkombëtar ndaj Izraelit po rritet, teksa ekspertët paralajmërojnë për një uri masive të shkaktuar nga njeriu në Gaza. Jenča theksoi se çdo zgjerim i mëtejshëm ushtarak “do të rrezikonte miliona palestinezë” dhe pengjet që mbahen ende në Gaza.
Ai nënvizoi gjithashtu se, sipas ligjit ndërkombëtar, Gaza “është dhe duhet të mbetet pjesë integrale e një shteti të ardhshëm palestinez”.
Izraeli ka deklaruar se aktualisht kontrollon 75% të Gazës, por plani i ri do të përfshinte pushtimin e të gjithë territorit, përfshirë zonat ku jetojnë mbi dy milionë palestinezë. Propozimi ka shkaktuar përçarje brenda Izraelit, me raportime se shefi i shtabit të ushtrisë dhe disa udhëheqës ushtarakë kundërshtojnë strategjinë.
Një zyrtar anonim izraelit u përgjigj: “Nëse kjo nuk i përshtatet shefit të shtabit, le të japë dorëheqjen.”
Familjarët e pengjeve kanë shprehur frikën se një vendim i tillë mund të vërë në rrezik jetën e të afërmve të tyre. Aktualisht, Izraeli thotë se 49 pengje mbahen ende në Gaza, nga të cilët 27 besohet të jenë të vdekur.
Jenča i bëri sërish thirrje Këshillit të Sigurimit për një armëpushim të menjëhershëm dhe lirimin pa kushte të të gjitha pengjeve. Duke përshkruar kushtet si “të mjerueshme” dhe “çnjerëzore”, ai i kërkoi Izraelit të lejojë hyrjen e pandërprerë të ndihmave humanitare. “Izraeli vazhdon të kufizojë rëndë ndihmën humanitare për në Gaza dhe ajo që lejohet të hyjë është jashtëzakonisht e pamjaftueshme”, tha ai.
Jenča dënoi gjithashtu dhunën e vazhdueshme në pikat e shpërndarjes së ushqimeve, duke thënë se mbi 1,200 palestinezë janë vrarë që nga fundi i majit, ndërsa përpiqeshin të siguronin ushqime dhe ndihma.
Ministria e Shëndetësisë në Gaza tha javën e kaluar se 154 persona – përfshirë 89 fëmijë – kanë vdekur nga uria që nga tetori 2023. Agjencitë e OKB-së kanë paralajmëruar për një uri të shkaktuar nga njeriu dhe kanë raportuar të paktën 63 vdekje të lidhura me kequshqyerjen vetëm këtë muaj.
Ndërkohë, Izraeli ka mohuar akuzat dhe ka thënë se nuk ka kufizime në ndihmat që hyjnë në Gaza dhe se “nuk ka uri”.
Izraeli nisi ofensivën ushtarake në Gaza pas sulmit të Hamasit më 7 tetor 2023 në jug të Izraelit, ku u vranë rreth 1,200 persona dhe 251 të tjerë u morën peng. Sipas Ministrisë së Shëndetësisë në territorin palestinez, mbi 60,000 palestinezë janë vrarë deri më tani nga fushata ushtarake izraelite./BBC
