Presidenti Donald Trump ka komentuar në rrjetet sociale sulmet raketore iraniane ndaj bazës së SHBA-së në Katar, duke i cilësuar ato si një “përgjigje shumë të dobët”, që sipas tij, ishte e pritur dhe u neutralizua me sukses.
Në postimin e tij, Presidenti Trump tha se prej 14 raketave të lëshuara, 13 u rrëzuan ndërsa njëra u lejua të vazhdonte, pasi ishte në një drejtim që nuk përbënte kërcënim.
“Jam i kënaqur të raportoj se nuk ka pasur amerikanë të lënduar dhe pothuajse asnjë dëmtim nuk është shkaktuar,” shkroi Trump.
Ai falënderoi edhe Iranin për paralajmërimin e hershëm të sulmeve, që sipas tij ndihmoi që të mos humbeshin jetë dhe askush të mos dëmtohej.
“Shpresoj që tani Irani të vazhdojë drejt paqes dhe harmonisë në rajon, dhe unë do të inkurajoj me entuziazëm Izraelin që të ndjekë të njëjtën rrugë,” përfundoi ai.
Sulmet iraniane erdhën si hakmarrje ndaj sulmeve ajrore amerikane ndaj objekteve bërthamore iraniane gjatë fundjavës, duke tensionuar më tej situatën në Lindjen e Mesme.
