Greqia vijon të mbetet e shqetësuar për pasojat që mund të sjellë konflikti në Lindjen e Mesme, me theks të veçantë tek emigracioni i paligjshëm. Kryeministri grek, Kiriakos Mitsotakis, paralajmëroi se sulmet e fundit në rajon mund të nxisin një tjetër valë emigrantësh drejt Mesdheut, duke theksuar se kjo situatë përbën një rrezik të shtuar për sigurinë e kufijve të vendit.
Gjatë një takimi me Presidentin e Republikës, Konstandinos Tasulas, Mitsotakis deklaroi se një pjesë e anijeve të marinës greke do të dislokohen jashtë ujërave territoriale të Libisë, në përpjekje për të frenuar fluksin e emigrantëve të paligjshëm që mund të nisen nga kjo zonë.
“Kontrabandistët nuk do të diktojnë se kush hyn në Greqi,” u shpreh kryeministri, duke theksuar se kjo çështje do të trajtohet edhe në nivele më të larta ndërkombëtare, përfshirë takimet në Bruksel dhe samitin e radhës të NATO-s. Ai ritheksoi mbështetjen e Greqisë për rritjen e buxhetit të mbrojtjes nga shtetet anëtare të Aleancës.
Në lidhje me përshkallëzimin e situatës në Lindjen e Mesme, Mitsotakis shprehu shqetësimin e qeverisë greke dhe bëri thirrje për kthimin e palëve në tryezën e negociatave. “Përshkallëzimi i operacioneve ushtarake do të sjellë më shumë probleme sesa zgjidhje,” tha ai, duke nënvizuar edhe pasojat e mundshme ekonomike që një konflikt i zgjatur mund të ketë për rajonin dhe më gjerë.
