Një tragjedi e rëndë ka goditur Maqedoninë e Veriut në orët e para të mëngjesit të së dielës, ku një zjarr i fuqishëm gjatë një koncerti në një klub nate në Koçan ka shkaktuar të paktën 59 viktima dhe mbi 155 të plagosur. Qeveria ka shpallur shtatë ditë zie kombëtare në nder të jetëve të humbura.
Sipas autoriteteve, deri më tani janë identifikuar 35 viktima, nga të cilët 31 janë nga Koçani dhe 4 nga Shtipi. Ndërkohë, të plagosurit janë duke marrë trajtim mjekësor në klinikat e Shkupit.
Kryeministri maqedonas, Hristijan Mickoski, ka deklaruar se objekti ku ndodhi tragjedia operonte me një licencë të falsifikuar, e lëshuar në mars të vitit të kaluar. Ai ka paralajmëruar ndjekje penale për të gjithë ata që kanë pasur përgjegjësi në këtë çështje.
Ministri i Brendshëm, Pançe Toshkovski, ka bërë të ditur se zjarri ka shpërthyer si pasojë e përdorimit të mjeteve piroteknike për efekt ndriçimi gjatë koncertit. Autoritetet kanë nisur një hetim të thelluar dhe deri tani janë identifikuar 20 persona të dyshuar, 15 prej të cilëve janë arrestuar.
