Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet dhe ka dërguar për gjykim dosjen nr. 108 të vitit 2024, e cila dokumenton një rrjet të strukturuar kriminal shqiptar, i përfshirë në trafikun ndërkombëtar të kokainës dhe heroinës, me destinacion kryesor Zvicrën.
Sipas hetimeve, sasia e konsiderueshme e drogës, kryesisht kokainë dhe heroinë, vinte nga Amerika Latine dhe përhapej në rajonin e Kantonit Solothurn, si dhe në vende të tjera të Zvicrës. Ky trafik i organizuar u zbardh falë bashkëpunimit të ngushtë mes autoriteteve shqiptare dhe atyre zvicerane.
Në qendër të këtij rrjeti kriminal janë dy shtetas shqiptarë, të cilët sipas SPAK-ut ishin “kokat” e grupit dhe drejtonin veprimtarinë kriminale:
- Gëzim Bakalli (i njohur edhe me aliasin Shkëmbim Cërmanji), i cili kishte rolin e drejtuesit dhe financuesit të grupit kriminal, i akuzuar për trafikim të lëndëve narkotike në 15 episode, si dhe për falsifikim të dokumenteve të ndryshme kosovare.
- Erjon Loci, i cili ishte një nga bashkëpunëtorët kryesorë në transportimin dhe shpërndarjen e drogës në Zvicër, i akuzuar për prodhim dhe shitje të narkotikëve në 6 episode.
Përmes përdorimit të platformave të enkriptuara si “Sky ECC”, “Threema” dhe “Signal”, ky grup kriminal koordinonte aktivitetin e tij në mënyrë të fshehtë dhe efikase. Nga hetimet rezulton se anëtarët e grupit kanë trafikuar sasi të mëdha kokainë dhe heroinë, duke përfshirë 345.4 kilogramë kokainë me përqindje pastërtie që varionte nga 44.2% në 86.9% dhe 22.25 kilogramë heroinë me pastërti nga 30.7% deri në 62%.
Në kuadër të këtij procedimi, autoritetet kanë sekuestruar gjithashtu 10,000 tableta ecstasy, 2 kilogramë marijuanë, armë zjarri, municion, orë luksoze dhe dokumentacion të falsifikuar, që dëshmojnë për seriozitetin e skemës kriminale.
SPAK vijon hetimet për identifikimin e bashkëpunëtorëve të tjerë të këtij rrjeti, duke ndjekur edhe procedimin e ndarë nr. 108/1 të vitit 2025, ndërkohë që ky është një nga operacionet më të rëndësishme të goditjes së trafikut ndërkombëtar të drogës nga autoritetet shqiptare në bashkëpunim me partnerët ndërkombëtarë.
