Trafik armësh nga Shqipëria në Greqi, sekuestrohen mbi 20 mijë fishekë
Kretë: Organizatë kriminale futi në mënyrë të paligjshme municione nga Shqipëria – U sekuestruan mbi 20.000 fishekë
Një 65-vjeçar kishte krijuar organizatën dhe kishte rol qendror, ndërsa merrnin pjesë gjithashtu një 73-vjeçar dhe një 72-vjeçar.
Policia greke ka çmontuar një organizatë kriminale që vepronte në Kretë dhe në Greqinë veriore, duke futur në mënyrë të paligjshme sasi të mëdha municionesh nga Shqipëria. Operacioni i koordinuar policor u zhvillua paralelisht në zonat e Hanias dhe Kastorias, me pjesëmarrjen e policisë nga Njësia e Luftës kundër Krimit të Organizuar e Greqisë Veriore. Gjatë operacionit u arrestuan 4 anëtarë të organizatës dhe një person tjetër. Ndaj tyre dhe ndaj një personi tjetër është ngritur dosje penale për formim organizate kriminale dhe shkelje të ligjit për armët.
Sipas hetimeve, që nga prilli i vitit 2025, këta persona kishin krijuar dhe ishin bërë pjesë e një organizate kriminale me qëllim futjen e paligjshme të sasive të mëdha të municioneve në Greqi dhe shpërndarjen e tyre për shitje në Kretë, me qëllim përfitimin ekonomik.
Për të arritur qëllimin, ata përdornin një mënyrë veprimi të strukturuar (modus operandi), konkretisht: mblidhnin porositë për municionet, siguronin sasitë e nevojshme nga një furnizues i panjohur në Shqipëri, dhe më pas tre anëtarë udhëtonin me dy automjete drejt kufirit, prej të cilëve njëri automjet ishte një kamion i modifikuar me një vend të fshehtë ku fshiheshin fishekët. Më pas ktheheshin në Kretë (me rrugë tokësore dhe me traget) dhe i shisnin fishekët në treg kundrejt pagesës.
Anëtarët kishin role të ndara:
65-vjeçari, themelues i organizatës dhe drejtues, mblidhte porositë, shkonte si pasagjer në kufi për të mbikëqyrur marrjen e municioneve dhe pagesat, dhe i shiste vetë fishekët në Kretë duke lëvizur me motoçikletë.
72-vjeçari, kishte modifikuar fshehurazi një hapësirë brenda kamionit ku fshiheshin municionet, dhe drejtonte mjetin në të cilin udhëtonte edhe 65-vjeçari.
73-vjeçari, ishte shoferi i kamionit që shkonte deri në kufi dhe pastaj kthehej në Kretë.
41-vjeçari, shtetas shqiptar, siguronte municionet nga një bashkatdhetar i tij dhe i dorëzonte në territorin grek.
Për të shmangur zbulimin, ata merrnin masa të rrepta sigurie: përdornin një kamion në pronësi të një personi të ndjerë (hetohet si e përfituan), e kishin modifikuar enkas për fshehjen e municioneve, fiknin telefonat gjatë transportit dhe përdornin të dhëna të rreme për biletat e tragetit.
Gjatë operacionit, njësia e Antikrimit të Organizuar në Kretë arrestoi 65-vjeçarin, 72-vjeçarin dhe 73-vjeçarin, gjatë momentit të marrjes së municioneve, ku u gjetën të fshehura në kamion mbi 24.000 fishekë. Në të njëjtën kohë, 41-vjeçari u arrestua në Kastoria nga policia e Greqisë Veriore.
Gjithashtu, në Kretë u arrestua një 30-vjeçar, i cili kishte blerë më parë municione nga drejtuesi i organizatës. Në total, nga kontrollet në automjete dhe banesa, u gjetën dhe u sekuestruan:
24.126 fishekë
Një pushkë luftarake
900 euro
Automjete (motoçikletë, kamion dhe veturë private)
Vlen të përmendet se 65-vjeçari ishte arrestuar edhe në vitin 2019 për një çështje të ngjashme dhe ndaj tij ishin vendosur masa kufizuese. Fishekët dhe arma e sekuestruar do të ekzaminohen nga autoritetet kompetente, ndërsa të arrestuarit do të dërgohen në Prokurorinë përkatëse.
