Gjashtë protestues janë shoqëruar nga policia pranë gjimnazit “Qemal Stafa” në Tiranë, sipas informacionit të dhënë nga vetë protestuesit. Ata bëjnë me dije se personat e shoqëruar janë dërguar në Komisariatin nr. 3.
Grupi ishte ndalur pranë shkollës në momentin kur po këndohej himni kombëtar. Protestuesit u bënin thirrje nxënësve të braktisnin mësimin dhe t’i bashkoheshin protestës.
Policia ndërhyri për t’i larguar nga ambientet pranë gjimnazit, ndërsa mes protestuesve dhe efektivëve pati edhe konfrontime.
Në ndërhyrje morën pjesë efektivë të policisë, të forcave “Shqiponja” dhe të FNSH-së, të cilët i zhvendosën protestuesit në drejtim të rrethrrotullimit të “Zogut të Zi”.
