Gjykata e Posaçme ka shpallur verdiktin për tre të pandehurit e akuzuar për atentatin e mbetur në tentativë ndaj Inez Hajrullës dhe Ervis Matodashajt më 7 gusht 2023.
Leonard Luzi, i akuzuar si organizator i atentatit, u dënua me 11 vite burgim; Muharrem Koroveshi me 10 vite burgim; ndërsa Amarildo Nikolli, i penduari i drejtësisë, u dënua me 7 vite e 4 muaj burg. Të tre të pandehurit përfituan ulje të një të tretës së dënimit për shkak të gjykimit të shkurtuar.
Gjatë shpalljes së vendimit, Leonard Luzi kërcënoi të penduarin e drejtësisë, Amarildo Nikollin, duke i thënë: "Do ta shohësh edhe ti, Amarildo," dhe më pas goditi me grusht xhamin e kafazit. Tensione pati edhe nga ana e Muharrem Koroveshit.
Atentati ndaj Inez Hajrullës u parandalua falë arrestimit të Amarildo Nikollit, i cili ishte paguar për të kryer vrasjen. Nikolli u pendua dhe rrëfeu urdhëruesin e krimit dhe bashkëpunëtorin e tij.
Inez Hajrulla konsiderohet kreu i grupit kriminal që dikur drejtohej nga Edison Arizaj, i njohur si Edison Faqedjeguri, i cili u ekzekutua në vitin 2018 në Durrës.
