SPAK paraqiti këtë të martë në Gjykatën e Posaçme kundër Korrupsionit dhe Krimit të Organizuar pretencën për një fraksion të veçuar të dosjes penale që lidhet me kryebashkiakun e Tiranës, Erion Veliaj. Në këtë proces janë përfshirë tetë të pandehur, të cilët kanë zgjedhur të gjykohen me procedurën e gjykimit të shkurtuar dhe akuzohen si bashkëpunëtorë të Veliajt.
Sipas kërkesës së Prokurorisë së Posaçme, për Fatmir Bektashin u kërkua dënimi me 1 vit burg, i reduktuar në 8 muaj për shkak të gjykimit të shkurtuar, si dhe pezullimi nga ushtrimi i funksioneve në interes publik. Për kompaninë e tij, “Kontakt” sh.p.k., SPAK kërkoi gjobë në vlerën 583 mijë lekë.
Për Ina Goxhajn u kërkua dënimi me 7 vite burg, i reduktuar në 4 vite e 8 muaj, me pezullim të ekzekutimit të dënimit dhe vendosje në shërbim prove për 5 vite. I njëjti dënim u kërkua edhe për biznesmenin Elman Abule, i cili përfiton ulje në 4 vite e 8 muaj për shkak të gjykimit të shkurtuar.
Për Frosina Bollon u kërkua 1 vit burg, i reduktuar në 8 muaj, ndërsa për organizatën jofitimprurëse “Frobolus” u kërkua gjobë prej 500 mijë lekësh, e reduktuar në 333 mijë lekë.
Për Adela Kondakçin, SPAK kërkoi 7 vite burg, të reduktuara në 4 vite e 8 muaj, duke kërkuar përjashtimin e saj nga vuajtja e dënimit. Ndërkohë, për ish-deputeten socialiste Klotilda Bushka u kërkua gjobë prej 600 mijë lekësh, e reduktuar në 400 mijë lekë, ndërsa për Flutura Xhanin gjobë prej 60 mijë lekësh, e reduktuar në 40 mijë lekë.
Për Fatjon Baçin u kërkua dënimi me 5 vite burg, i reduktuar në 3 vite e 4 muaj për shkak të gjykimit të shkurtuar, me pezullim të ekzekutimit të dënimit dhe vendosje në shërbim prove.
