Mbrëmjen e sotme, në orën 19:00, pritet të zhvillohet protesta e 32-të radhazi kundër kryeministrit Edi Rama dhe qeverisë së tij.
Organizatorët u kanë bërë apel qytetarëve nga të gjitha qytetet e vendit, si edhe shqiptarëve që jetojnë jashtë Shqipërisë, të marrin pjesë në tubimin që do të mbahet në Tiranë.
Sipas njoftimit, protestuesit do të mblidhen fillimisht në sheshin “Skënderbej”, për të vijuar më pas marshimin drejt godinës së Kryeministrisë, ku do të zhvillohet protesta kryesore.
Dorëheqja e kryeministrit Rama mbetet kërkesa kryesore e organizatorëve, të cilët kanë paralajmëruar se tubimet do të vijojnë deri në realizimin e saj.
Ata kanë bërë thirrje për pjesëmarrje sa më të madhe në protestën e sotme, e cila shënon protestën e 32-të radhazi dhe një muaj nga nisja e këtyre tubimeve.
