Bisedimet mes Iranit dhe Shteteve të Bashkuara, që nisën këtë pasdite në nivel politik, kanë hyrë në një fazë të re që përfshin ekspertë dhe teknikë nga të dyja palët. Lajmi është raportuar nga agjencia iraniane IRNA.
Sipas saj, në negociata po marrin pjesë komisione të specializuara dhe takimet teknike do të vazhdojnë për të finalizuar çështjet që mbeten ende të hapura. Gjatë bisedimeve, Irani ka këmbëngulur për një armëpushim të plotë në Liban.
Nga ana tjetër, Shtetet e Bashkuara kanë pranuar të nisin studime teknike mbi mekanizmat për lirimin e aseteve iraniane të bllokuara. Megjithatë, sipas IRNA, të dyja palët kanë rënë dakord se kjo çështje kërkon diskutime më të detajuara në nivel ekspertësh.
Ndërkohë, zëvendësministri i Jashtëm iranian Kazem Gharibabadi, pjesë e delegacionit të Teheranit në bisedimet me Uashingtonin në Islamabad, deklaroi se Irani është i përgatitur për çdo zhvillim të mundshëm.
“Irani është gati për çdo skenar që mund të pasojë nga këto bisedime, qoftë ai ushtarak dhe mbrojtës, qoftë ai i negociatave”, tha Gharibabadi, sipas agjencisë Tasnim. Ai shtoi se shpreson në “përfundime pozitive”, duke theksuar seriozitetin e delegacionit iranian dhe, sipas tij, “pozicionin e fortë të Iranit”.
Në të njëjtën kohë, një tjetër anëtar i delegacionit iranian, zëdhënësi i Ministrisë së Jashtme Esmaeil Baghaei, bëri të ditur se shkëmbimi i mesazheve mes palëve kishte nisur që nga nata e mëparshme, pas mbërritjes së delegacioneve në Islamabad. Ai theksoi se Teherani ka kërkuar një armëpushim të plotë mes Iranit dhe boshtit SHBA-Izrael, ndërsa shtoi se Irani është gjithashtu në kontakt me Libanin për të verifikuar nëse një armëpushim i plotë është zbatuar realisht edhe atje.
Paralelisht me negociatat, kanë vijuar edhe përplasjet e deklaratave lidhur me situatën në Ngushticën e Hormuzit. Një zyrtar amerikan, i cituar nga gazetari i Axios Barak Ravid në rrjetin X, tha se Shtetet e Bashkuara nuk kanë marrë asnjë kërcënim nga Irani për sulme ndaj anijeve të marinës amerikane që mund të kalojnë nëpër këtë korridor strategjik.
Deklarata vjen pasi disa media iraniane kishin raportuar se Teherani kishte paralajmëruar Uashingtonin për një hakmarrje të mundshme ndaj anijeve amerikane që do të tentonin të kalonin nëpër Ngushticën e Hormuzit.
Nga ana tjetër, një zyrtar i lartë ushtarak iranian ka hedhur poshtë një raport të Axios sipas të cilit disa anije amerikane do të kishin kaluar tashmë nëpër Hormuz. Sipas transmetuesit shtetëror iranian IRIB, zyrtari ka mohuar kategorikisht që anije të SHBA-ve të kenë kaluar nëpër këtë ngushticë.
