Prokuroria e Specializuar në Hagë ka shkaktuar një skandal të madh duke iu referuar Kosovës si “Kosova dhe Metohija”, një term i përdorur nga Beogradi zyrtar që ka ngjallur reagime të shumta për shkelje të sovranitetit të Kosovës. Ky incident ka ndodhur gjatë një intervistimi të Sefer Goxhulit, një dëshmitar në procesin ndaj ish-krerëve të UÇK-së, të cilët janë të mbajtur në Hagë për akuza për krime lufte dhe pengim të drejtësisë.
Në 11 nëntor 2022, Goxhuli u intervistua nga hetuesit e Prokurorisë së Specializuar, ku gjatë procesit të hetimit ai u befasua kur përfaqësuesit e prokurorisë përdorën termin “Kosova dhe Metohija”. Ky term është përdorur shpesh nga autoritetet serbe për të mohuar pavarësinë e Kosovës dhe është cilësuar si një shprehje pezhorative.
Incidenti u zbardh pas një ankesë të Goxhulit drejtuar Avokatit të Popullit në Hagë, ku ai denoncoi përdorimin e këtij termi dhe shqetësimet për mospërfilljen nga ana e juristëve të Prokurorisë. Goxhuli e quajti këtë një gabim të qëllimshëm, pasi termi ishte i shkruar në një dokument që ishte lexuar gjatë intervistës.
Edhe pse Prokuroria e Hagës pranoi përdorimin e këtij termi, ankesa e Goxhulit u refuzua me arsyetimin se ishte një gabim i paqëllimshëm. Ky zhvillim ka shkaktuar reagime të shumta në Kosovë, ku shumë analistë dhe politikanë e konsiderojnë këtë një shkelje të rëndë të sovranitetit dhe një pasqyrë të qëndrimeve të dyshimta të institucionit ndërkombëtar.
