Në protestën e zakonshme poshtë ballkonit të shtëpisë, kreu i PD Sali Berisha e ka nisur mbrëmjen e sotme duke transmetuar në monitorin para protestuesve kronikën e deklaratës të kompanisë “Kurum” kur kjo e fundit deklaroi se mbetjet toksike nuk ishin të saja.
Berisha ka marrë në mbrojtje kompaninë “Kurum”, duke thënë se Ministria e Mjedisit ka mashtruar shqiptarët kur tha se mbetjet vijnë nga furat e kompanisë në fjalë. Kreu i PD, duke e konsideruar Kurum si një sipërmarrje të madhe, u shpreh se mbetjet nuk janë të Kurum por dokumentacioni është plotësuar siur janë të kësaj kompanie.
“Ministria e Mjedisit mashtroi shqiptarët se ato mbetje vijnë nga furnaltat e Kurum. Shqipëria ka furrnalta hekuri, çeliku, kromi, por dhe furra alumini dhe metalesh të tjera. Por këto janë veprimtari legale, këto janë veprimtari të kontrolluara nga të gjitha anët. Në këto furra shkrihet hekur, shkrihet krom, shkrihet çelik, alumin dhe të tjerë. Dhe këto furra në mënyrë transparente kanë procedurat ku i depozitojnë mbetjet e tyre, të rrezikshme, të parrezikshme, ku i eksportojnë, cili është destinacioni i tyre. Kjo është një veprimtari dhjetëra vjeçare. Por ministria e Mjedisit deklaroi dje, se mbetjet i ka eksportuar Kurumi. Sot kjo sipërmarrje e madhe me një aktivitet pothuajse 30 vjeçare në Elbasan, deklaroi se ato mbetje nuk kanë asnjë lidhje me uzinën e Kurumit. Pra, ato mbetje thotë Kurumi, nuk kanë lidhje me uzinën, por dokumentacioni është plotësuar sikur janë të Kurumit. Shikoni pra çfarë qeverie, trafikante, falsifikatore e turpshme. Shikoni se ç’bëjnë. Shikoni se ç’bën Edi Rama për bizneset e tij. Shikoni se çfarë bën Edi Rama me trafikun që bën me helme dhe toksina. Merr emrin, falsifikon dokumente dhe i eksporton ato, sikur të jenë të një ndërmarrje private” – tha Berisha.
Nuk dihet se pse ish-kryeministri e ka mbrojtur me kaq zell kompaninë Kurum, kur skandali tashmë është në duart e drejtësisë për t’u hetuar. Edhe nëse mbetjet nuk janë të kësaj kompanie, do mjaftonte vetëm një deklaratë e Berishës për t’i bërë thirrje Prokurorisë që ta çonte deri në fund këtë skandal, pa marrë në mbrojtje asnjë subjekt që përmendet në këtë çështje.
