Me rastin e 5-vjetorit të krijimit të SPAK, drejtuesi i Prokurorisë së Posaçme, Altin Dumani, vlerësoi punën e institucionit dhe ndikimin e tij në forcimin e drejtësisë në Shqipëri. Gjatë fjalës së tij, Dumani theksoi rezultatet konkrete në luftën kundër korrupsionit, krimit të organizuar dhe terrorizmit.
“Prokuroria e Posaçme u krijua për të treguar se të gjithë janë të barabartë përpara ligjit dhe askush nuk mund të jetë i privilegjuar prej tij,” u shpreh Dumani.
Në këto pesë vite, SPAK ka:
•Hetuar 2,946 persona, nga të cilët 1,387 janë dërguar për gjykim.
•Sekuestruar dhe konfiskuar mbi 182 milionë euro asete të siguruara përmes aktiviteteve të paligjshme.
•Proceduar 61 zyrtarë të lartë për korrupsion, nga të cilët 70% janë dërguar për gjykim.
•Hetuar 955 persona për krim të organizuar, me 55% të rasteve të dërguara në gjykim.
•Proceduar 29 persona për terrorizëm, të gjithë të dërguar për gjykim.
Dumani nënvizoi se drejtësia sot është më e fortë dhe më e pavarur. “Korrupsioni dhe krimi nuk mund të zhduken brenda ditës, por ne qëndrojmë të bashkuar për të çuar përpara këtë mision jetik,” tha ai.
Ai falënderoi partnerët ndërkombëtarë, veçanërisht Shtetet e Bashkuara dhe Bashkimin Evropian, për mbështetjen e tyre të vazhdueshme, si dhe familjarët e prokurorëve dhe hetuesve për sakrificat e tyre.
“Nuk ka më të paprekshëm në Shqipëri. Ligji zbatohet njësoj për të gjithë dhe askush nuk është mbi të,” përfundoi Dumani, duke theksuar angazhimin e SPAK për një drejtësi të fortë dhe të barabartë për të gjithë qytetarët shqiptarë.
