Aurel Zarka ish-drejtues i prokurorisë së Vlorës është marrë i pandehur për akuzat e korrupsionit dhe ushtrimit të ndikimit të paligjshëm. Ish-oficerja gjyqësore Erjona Daupaj akuzohet për korrupsion, ushtrim ndikimi dhe zbulim të akteve sekrete, avokati Radovan Cela nën akuzë për korrupsion e ushtrim ndikimi, ndërsa biznesmeni Astrit Vladi akuzohet për korrupsion. Prokurori i Posacëm Klodian Braho iu ka njoftuar të pandehurve dhe avokatëve përfundimin e hetimeve dhe brenda 10 ditëve ata duhet të paraqesin argumentat e tyre. Dosja Toyota Auris lidhet me sekuestrimin e 3.4 mln euro në Portin e Durrësit fshehur në makina që vinin nga Belgjika. Paratë dyshohet se janë produkt i veprimtarisë kriminale të trafikut të drogës.
ish-prokurori i Vlorës Aurel Zarka dhe Erjona Daupaj, ish-oficere e policisë gjyqësore në ish-prokurorisë për Krime të Rënda, akuzohen se kanë ofruar dhe pranuar para në këmbim të favorizimit të kushërinjve Elvis dhe Alfred Vladi të akuzuar për trafikimin e 3.4 mln euro. Paratë dyshohet se u janë paguar nga avokati Radovan Cela dhe biznesmeni Astrit Vladi, që kishte interes të drejtpërdrejtë për të shpëtuar vëllain dhe kushëririn. SPAK ka në duar komunikimet në SKy Ecc të 4 të pandehurve, të cilët kanë folur edhe në emra të njerëzve të tjerë të drejtësisë, përfshirë dhe prokurorë të SPAK për të mbyllur në favor të kushërinjve Vladi cështjen, por edhe për të favorizuar Suel Celën pasuria e të cilit po hetohet në kuadër të Operacionit Forca e Ligjit. Dosja Toyota Auris që shkaktoi tërmet në politikë u mbyll atëkohë vetëm me dënimin e Elvis Vladit, për kontrabandim të të hollave në kufi. Por tashmë nën akuzë janë njerëzit e drejtësisë, ndërsa SPAK po vijon hetimet në një dosje të vecuar për zyrtarë dhe ish-zyrtarë të tjerë, si dhe personazhe të politikës, të dyshuar për përfshirje në këtë aferë.
