Ideja për krijimin e një entiteti sovran të Urdhrit Bektashi, e cila u hodh nga kryeministri Edi Rama, nuk ka përparuar. Këtë e konfirmoi kreu i bektashinjve, Edmond Brahimaj, gjatë një aktiviteti në Mallakastër, ku theksoi se nuk ka asgjë konkrete për këtë çështje. “Nuk ka asgjë të re përveç asaj që ka deklaruar kryeministri, dhe do t’ju njoftojmë sapo të ketë ndonjë zhvillim,” u shpreh Baba Mondi.
Kjo ishte hera e parë që Edmond Brahimaj iu përgjigj pyetjeve të mediave shqiptare për këtë temë, por nuk ndau detaje të tjera. Së fundmi, ai pati një intervistë për gazetën “The Jerusalem Post”, ku shprehu shqetësimin se bektashinjtë i kanë kërkuar qeverisë shqiptare të veprojë më shpejt për realizimin e idesë për një shtet bektashi. Sipas tij, hapat e parë përfshijnë miratimin e një ligji për të ndryshuar statusin e bektashinjve, ndërsa po shqyrtohen strategji të ndryshme për zbatimin e këtij plani.
Baba Mondi mori pjesë sot në ceremoninë e përurimit të shtatores së Baba Haxhi Saliajt në qendër të fshatit Ninësh, duke e vlerësuar atë si një simbol të fisnikërisë.
