Gjykata e Posaçme firmosi për shtyrjen e procesit ndaj Ilir Metës dhe Monika Kryemadhit, për shkak se avokatët vijojnë bojkotin.
Trupa gjykuese deklaroi se bojkoti është i paligjshëm dhe, për rrjedhojë, i gjobiti avokatët me nga 5 mijë lekë secilin.
Me kërkesën e SPAK, gjykata pezulloi afatet e paraburgimit për ish-presidentin Meta.
“Unë kam qenë i pranishëm që prej ditës së parë. Mungesa e avokatëve po përdoret në mënyrë abuzive për pezullimin e afateve të paraburgimit, në mënyrë që të mos më njihet asnjë ditë burg. Nuk e kuptoj konfliktin mes avokatëve dhe Gjykatës. Unë nuk mund t’i kërkoj avokatit tim të humbasë licencën. E kundërshtoj kërkesën e prokurorisë për pezullimin e afateve të paraburgimit. Unë jam këtu dhe dua që gjykimi të vijojë, përndryshe ky konflikt është i stisur. Unë kam kërkuar ndërhyrjen e Kuvendit. Nuk jam shkak i këtij konflikti”, deklaroi Meta.
Teksa trupa gjykuese la sallën e gjyqit, Ilir Meta deklaroi se konflikti është i stisur nga shokët e Ergys Agasit.
