Gjykata Kushtetuese është mbledhur për të diskutuar çështjen e shumëdebatuar të ministres virtuale “Diella”, por deri më tani nuk ka marrë një vendim.
Gjyqtarët kushtetues kanë zhvilluar diskutime lidhur me çështjen, e cila konsiderohet e veçantë për shkak se lidhet me rastin e parë të dekretimit të një ministreje virtuale. Pavarësisht shqyrtimit, ende nuk ka një qëndrim përfundimtar nga Gjykata Kushtetuese.
Kushtetuesja u vu në lëvizje pas padisë së depozituar nga Partia Demokratike, e cila kërkon shfuqizimin e dispozitave të dy dekreteve të Presidentit të Republikës që lidhen me emërimin e Kryeministrit dhe të Këshillit të Ministrave, duke i konsideruar ato të papajtueshme me Kushtetutën.
Në padinë e saj, PD argumenton se krijimi i një ministri virtual apo real nga Presidenti tejkalon kompetencat kushtetuese të kreut të shtetit dhe cenon kompetencat e Kryeministrit, Këshillit të Ministrave dhe Kuvendit.
Sipas padisë, përcaktimi i përgjegjësive të reja për Kryeministrin nuk mund të bëhet përmes një dekreti presidencial, por kërkon ndryshime kushtetuese ose ligjore të miratuara nga Kuvendi.
Gjatë muajve të fundit, Gjykata Kushtetuese ka zhvilluar diskutime edhe me Komisionin e Venecias lidhur me këtë çështje.
Pavarësisht pritshmërive për një vendimmarrje, çështja “Diella” mbetet ende e hapur dhe pritet që Gjykata Kushtetuese të dalë me qëndrimin e saj përfundimtar.
