Nga Ilir Ciko
“Do as your eagle does: she flies high, but never forgets the nest.” ~Pope Francis, Tirana, 2014.
Shqiponja e Malit / The Golden Eagle / Aquila Chrysaetos
Shqipëri, Nëntor 2024
Shqiponja e malit, admirohet në gjithë botën dhe është simboli kombëtar apo pjesë e flamurit të disa vendeve, përfshirë Gjermaninë, Meksikën, Afganistanin, Rumaninë etj. Megjithatë, asnjë prej tyre nuk ka një lidhje aq të fortë midis emrit të shpendit dhe atij të vendit, identitetit kombëtar, historisë dhe atij të gjuhës, si në rastin tonë. Sikurse ka një vend të vetëm në botë, që kudo njihet si toka e shqiponjave.
Zgjodha për të përshëndetur të gjithë miqtë me rastin e Ditës së Flamurit me një foto të shpendit tonë kombëtar, të fotografuar duke fluturuar krejt në liri vetëm pak ditë më parë mes bjeshkëve të bukura të Shqipërisë prej një distance të afërt që druaj se vështirë do ma sjellë fati sërish ndonjëherë. Mes shumë fotosh, përzgjodha këtë profil pasi shpalos madhështinë dy metroshe të krahëve dhe nxjerr mirë në pah mes mistikes së portretit tiparin kryesor të shqiponjës së malit që e dallon në mënyrë të veçantë e krejt të pagabueshme nga të gjitha llojet e shqiponjave të tjera: Kreshtën e praruar ngjyrë ari, të feksur nga rrezet e diellit të mëngjesit, e cila i jep dhe emërtimin e saj në gjuhën angleze (golden eagle), e që herë pas here përdoret si emërtim dytësor edhe në shqip, si shqiponja e artë (ndonëse vetë preferoj atë parësor që emblematikisht e shoh më domethënës në lidhjen e shpendit me malet e Shqipërisë).
Gëzuar të gjithëve Ditën e Flamurit!
