Policia e Vlorës është duke vijuar kontrollet në disa banesa në qytetin bregdetar ku dyshohet se mund të fshihet autori i dyshuar i vendosjes së tritolit në lokalin në pronësi të nënës së Bledar Bircaj, ky i fundit i ekzekutuar me 10 maj të 2021 në automjetin e tij në lagjen ‘Hajro Çakërri’.
Nga hetimet e para rezulton se një person që lëvizte me një bicikletë është afruar në verandën e lokalit “The Boss” që ndodhej në Lungomare, vendos aty lëndën eksplozive dhe largohet.
5 minuta më vonë, konkretisht në 6 pa 5 të mëngjesit, tritoli shpërthen duke shkaktuar dëmtime në xhamat e lokalit që administratohej nga vëllezërit e Bledar Bircaj.
Burime të besuara në policinë e Vlorës thanë se është gjetur bicikleta e përdorur nga autori i dyshuar dhe përmes kamerave po ndiqen lëvizjet e tij.
Lidhur me motivin, pavarësisht se dy vëllezërit e Bircaj pretendojnë se nuk kanë probleme, hetuesit dyshojnë se ngjarja lidhet me aktivitetin kriminal të 40-vjecarit të ekzekutuar.
Bledar Bircaj ka dyshime që në Spanjë është përfshirë në vjedhjen e një sasie të madhe kokaine që i përkiste një grupi kriminal nga Elbasani.
Ai u ekzekutua në maj të 2021 në mes të ditës, teksa udhëtonte bashkë me Granit Deromemaj, ish-efektiv i Antidrogës në Vlorë. Deromemaj mundi ti mbijetonte atentatit dhe u përjashtua nga policia.
Shpërthimi me tritol në lokalin e familjes ngre dyshime për hetuesit që grupi kriminal kërkon kthimin e parave që i është shkaktuar dëm nga grabitja e drogës nga Bledar Bircaj.
