Flakët vijojnë të përhapen me shpejtësi në malin e Shëngjinit, të favorizuara nga era e fortë, ndërsa ndërhyrja e zjarrfikësve mbetet e vështirë për shkak të terrenit të thyer pranë vatrës së zjarrit.
Në operacion janë angazhuar aktualisht pesë mjete zjarrfikëse, të cilat po punojnë për vënien nën kontroll të situatës.
Gjatë zhvillimit të zjarrit është raportuar edhe një shpërthim brenda perimetrit të vatrës, ndërsa dyshohet se një fragment guri ka plagosur pasagjerin e një automjeti që po lëvizte në drejtim të Shëngjinit.
I riu është transportuar menjëherë në Spitalin e Lezhës, ku po merr ndihmën e nevojshme mjekësore, ndërsa autoritetet po verifikojnë rrethanat dhe shkakun e plagosjes.
