Nga frika se nxënësit do ta përdornin inteligjencën artificiale për të kopjuar detyrat, shumë shkolla fillimisht reaguan duke bllokuar chatbotët.
Tani strategjia po ndryshon.
Në Shtetet e Bashkuara, një numër në rritje shkollash po përpiqen t’u mësojnë fëmijëve jo vetëm si ta përdorin AI-në, por edhe pse nuk duhet t’i besojnë verbërisht asaj.
Associated Press sjell shembullin e Charleston County School District në Karolinën e Jugut, ku shkollat po kalojnë nga kufizimi drejt edukimit për inteligjencën artificiale.
Një nga mësimet kryesore lidhet me të ashtuquajturat “hallucinacione”: raste kur një chatbot jep informacion të pavërtetë ose shpik fakte, por e paraqet përgjigjen sikur të ishte plotësisht i sigurt.
Nxënësit mësojnë të kontrollojnë burimet, të krahasojnë informacionin dhe të kuptojnë se përgjigjja e prodhuar nga AI nuk është automatikisht fakt.
Tema po përhapet në të gjithë sistemin amerikan të arsimit. Sipas AP, 37 shtete amerikane kanë ofruar tashmë udhëzime mbi përdorimin e inteligjencës artificiale në arsim.
Utah, për shembull, ka punësuar një specialist të dedikuar për AI-në në arsim dhe ka trajnuar më shumë se 7 mijë mësues.
Shkollat po përballen kështu me një realitet të ri: nxënësit ka shumë gjasa ta përdorin inteligjencën artificiale pavarësisht ndalimeve. Sfida është t’i mësojnë ta përdorin pa humbur aftësinë për të menduar, verifikuar dhe dalluar informacionin e rremë.
