Ambasadori i Gjermanisë në Shqipëri, Karl Bergner, në një inervistë për mediat theksoi se korrupsioni dhe krimi i organizuar janë probleme që ndikon jo vetëm në investimet gjermane, por gjithashtu në zhvillimin ekonomik dhe procesin e integrimit europian të vendit.
Duke folur për reformën në drejtësi, Bergner shprehu shqetësimin e tij për nevojën e ruajtjes së reformës së miratuar në vitin 2016.
“Reforma e vitit 2016 është themelore dhe nuk duhet të preket. Ajo ka kontribuar ndjeshëm në përmirësimin e situatës dhe në përfundimin e kulturës së pandëshkueshmërisë,” u shpreh ai.
Ai sugjeroi se ndryshime mund të bëhen vetëm për të zgjeruar fushën e veprimtarisë së reformës në sektorë të tjerë. Ambasadori vlerësoi arrestimet e fundit si një shenjë të fundit të pandëshkueshmërisë në vend.
“Suksesi më i dukshëm i reformës është puna e SPAK-ut, i cili ka arritur arrestime të rëndësishme. Koha e pandëshkueshmërisë ka kaluar; tani çdo individ është subjekt i ligjit, një lajm shumë pozitiv për qytetarët shqiptarë,” theksoi Bergner.
