Kreu i Partisë Demokratike, Sali Berisha, gjatë protestës së sotme poshtë shtëpisë së tij, i ka bërë thirrje Monika Kryemadhit që të informojë shqiptarët me ç’rast i dorëzoi Edi Ramës 460 mijë euro.
Duke folur për gjyqin që u mbajt sot për çështjen e inceneratorëve të Elbasanit, Berisha çuditërish ka përgëzuar ish-ministrin, Lefter Koka për dëshminë që dha sot, duke thënë se atij iu rikthye guximi. Ky përgëzim i Berishës erdhi pasi Koka tha sot në gjyq se po të hapet telefoni i Kryemadhit, aty do të gjendet edhe peshku i madh i inceneratorëve.
“Të dashur miq, sot personi të cilin e kemi quajtur gjithnjë ‘ladro utile’, hajdut i dobishëm, Lefter Kokës i erdhën dy pare mend. Iu rikthye edhe guximi.
Sot, në sallën e gjyqit, ai deklaroi se nuk jam unë autori i djegësve, se ‘peshku i madh’ është në telefonin e zonjës Kryemadhi.
Miq, Lefter Koka deklaroi me përgjegjësi para gjyqit se ‘peshku i madh’ është vetëm një dhe e ka emrin Edi Rama. Ndaj dhe këtu para jush, i bëj thirrje zonjës Kryemadhi, e cila deklaroi se Edi Rama ka urdhëruar Dumanin të fshijë të gjthë komunikimet e saj me Edi Ramën, t’ju bëjë të ditur shqiptarëve, të informojë shqiptarët për ‘peshkun e madh’, të informojë shqiptarët me ç’rast i dorëzove Edi Ramës 460 mijë euro. Të informojë shqiptarët gjithçka di për këtë kryehajdut të të gjitha kohërave.
Unë e kuptoj se çdo deklaratë që bëni, e bllokon mercenar Altin Dumani, që është shndërruar në galloshen e Edi Ramës. Por, çdo politikan dhe çdo qytetar ka detyrim madhor t’u rrëfejë të vërtetën qytetarëve të tyre” – u shpreh Berisha.
Deklarata e Berishës tregon edhe njëherë politikën e tranzicionit, ku për hir të pushtetit lavdërohet edhe ‘djalli’. Ish-ministri Lefter Koka i akuzuar për aferën me inceneratorin e Elbasanit, vitet e fundit ka qenë shënjestra e opozitës dhe kryesisht e Sali Berishës për të sulmuar qeverinë. Mjaftoi një gjysmë fjalë e ish-ministrit që nuk i shërben asnjë hetimi, që Berisha nga ballkoni të fillonte ta përgëzonte.
Lefter Koka, as më pak e as më shumë është një prej autorëve të aferës së inceneratorëve. Edhe nëse hap gojën për të treguar se kush janë bashkëautorët e kësaj afere, i shërben drejtësisë por jo se e bën njeri më të mirë.
