Kryeministri Edi Rama, i cili ndodhet në Budapest për Samitin e Komunitetit Politik Europian, u pyet nga gazetarët mbi zgjedhjet presidenciale në SHBA dhe mundësinë e një fitoreje të mundshme të Donald Trump. Rama vlerësoi se, megjithëse për herë të parë pas zgjedhjes së Trump, shumë menduan se NATO mund të dobësohej, realiteti ka treguar të kundërtën, duke e bërë Aleancën më të fortë. Ai shtoi se duhet të pritet për të parë se çfarë mund të ndodhë në të ardhmen, por se fitorja e Trump mund të përbëjë një mundësi për Europën.
“SHBA janë SHBA dhe nuk mendoj që kjo do të jetë domosdoshmërisht e keqe për Europën, mund të jetë më e mirë për Europën”, tha Rama, duke theksuar se shqiptarët janë komuniteti më pro-amerikan në Europë dhe nuk bëjnë dallim për atë që është në Shtëpinë e Bardhë.
Në samitin e sotëm, që po zhvillohet në Budapest, do të marrin pjesë 50 liderë të Europës, përfshirë edhe Sekretarin e Përgjithshëm të NATO-s, Mark Rutte. Temat kryesore të diskutimeve përfshijnë sfidat e përbashkëta nga lufta në Ukrainë dhe migracionin. Komuniteti Politik Europian, i krijuar nga presidenti francez Emmanuel Macron në vitin 2022, ka për qëllim të ofrojë një forum pan-evropian për diskutime, duke përfshirë dhe shtetet joanëtare të BE-së, si Ballkani, Ukraina, Moldavia dhe Gjeorgjia.
