Ministri i Shtetit për Marrëdhëniet me Parlamentin, Taulant Balla, ka replikuar ashpër ndaj opozitës gjatë diskutimeve në Kuvend, duke ironizuar deputetët e Partisë Demokratike dhe Lulzim Bashën. Ai theksoi se opozita po përballet me “probleme në matematikë”, duke aluduar për vështirësitë e tyre me të dhënat dhe zhvillimet e vendit.
Në fjalën e tij, Balla nënvizoi se buxheti i vitit 2025 është më i madhi në historinë e shtetit shqiptar që nga viti 1912. Ai shpjegoi se ky buxhet reflekton progresin e Shqipërisë dhe mundësinë e përfundimit të negociatave për anëtarësimin në Bashkimin Europian (BE) brenda vitit 2027.
Balla bëri gjithashtu një thirrje për bashkim të klasës politike shqiptare në procesin e integrimit europian. Ai theksoi se Shqipëria është në rrugën e duhur për t’u bërë anëtare e BE-së dhe se procesi mund të përmbyllet me sukses deri në vitin 2027, duke shtuar se anëtarësimi mund të realizohet deri në vitin 2030.
“Jemi në momentin që po diskutojmë buxhetin e vitit 2025, buxheti më i madh në histori. Komisionerja e re për Zgjerimin ka deklaruar se negociatat mund të përfundojnë më 2027 dhe Shqipëria po ecën drejt anëtarësimit në BE,” tha Balla.
