Policia e Fierit ka arrestuar Alesio Xhelon, një nga personat më të kërkuar nga autoritetet greke. Ai ndodhej në masën e sigurisë “arrest në shtëpi” me mbikëqyrje policore 24 orë, për akuzat e trafikut të armëve, largimit nga vendi i qëndrimit, rrëmbimit ose mbajtjes peng të personit, si dhe për tentativë vrasjeje të punonjësve të Policisë së Shtetit.
Ndërsa ishte në këtë masë sigurie, ai ka kërcënuar me sharje dhe ofendime një punonjës të Forcës Kombëtare të Sigurisë, i cili ishte në shërbim për mbikëqyrjen e 40-vjeçarit. Për këtë arsye, ai është vënë në pranga.
Alesio Xhelo, i njohur si "Titi", është i shumëkërkuar në Greqi, pasi në vitin 2019 u arratis nga burgu në shtetin helen, duke marrë peng një police. Ai u arrestua në Vlorë, duke u kapur me armë pa leje, dhe në tetor të po atij viti u vendos në arrest shtëpie, pasi ende nuk është marrë vendim për ekstradimin e tij.
Xhelo është i dënuar me burgim të përjetshëm për vrasje, dhunimin e gruas së një diplomati dhe për shkëmbim zjarri me policinë. Grupi kriminal i 40-vjeçarit, i cili njihet edhe me emrin Astrit Hasani, ka kryer aktivitetin e tij në zonën e Zografos, në Athinë.
