Ministri i Brendshëm, Ervin Hoxha, ka reaguar lidhur me situatën e krijuar një ditë më parë pranë SPAK, ku mbështetës të kryebashkiakut Erion Veliaj u grumbulluan në mbështetje të tij.
Në një deklaratë për mediat para se të hynte në Parlament, Hoxha tha se policia nuk ndërhyri, pasi personat e pranishëm nuk ishin protestues, por simpatizantë. Ai shtoi se në vendngjarje ndodhej edhe Garda e Republikës, e cila pati një moment vështirësie për shkak të grumbullimit të papritur.
“Në kushtet e një mase sigurie, Policia e Shtetit ka detyrën të sigurojë SPAK-un. Aty ndodheshin edhe punonjësit e Gardës, të cilët ishin në krye të detyrës, por patën një vështirësi për shkak të grumbullimit të papritur. Personat ishin simpatizantë dhe jo protestues. Protestuesit e mëparshëm kanë qenë të lajmëruar,” deklaroi ministri.
I pyetur nga gazetarët nëse do të shkarkojë Drejtorin e Policisë së Shtetit, Ilir Proda, Hoxha nuk dha një përgjigje të drejtpërdrejtë, duke thënë se situatat janë të ndryshme dhe se protestat e mëparshme kanë qenë të paralajmëruara.
Vërtet nuk ishte lajmëruar ministri brendshëm për një protestë që kishte nisur në 8 të mëngjesit?
