Policisë së Tiranës i janë dashur katër ditë për të reaguar dhe për të proceduar dhe për të arrestuar personat që thyen xhamat e godinës së Komisariatit Nr. 3, gjatë protestës kombëtare të ditës së shtunë.
Sipas njoftimit zyrtar të Policisë, pas veprimeve hetimore të kryera nën drejtimin e Prokurorisë, janë identifikuar 12 shtetas të dyshuar si të përfshirë në sulmin ndaj godinës dhe punonjësve të policisë. Deri më tani, është ndaluar 33-vjeçari Erald Heqimaj, i cili nuk rezulton me precedentë të mëparshëm dhe ka deklaruar se ka qëlluar me shkop i ekzaltuar nga turma. Po ashtu, 7 shtetas të tjerë (inicialet e të cilëve janë K. M., V. K., E. L., Sh. B., V. D., E. N. dhe B. K.) janë proceduar në gjendje të lirë, ndërsa 4 persona janë shpallur në kërkim pa iu bërë publik identiteti për shkak të hetimeve që vijojnë.
Nga ana tjetër, materialet procedurale ndaj të proceduarve i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë.
Ky reagim i vonuar i policisë vjen pas tensioneve të krijuara në protestën e 35-të anti-qeveritare, në momentin kur qytetarët marshuan drejt komisariatit për të kërkuar lirimin e 21 personave të arrestuar më herët.
Megjithatë, organizatorët e protestës sqaruan se xhamat e godinës u thyen specifikisht nga 4 persona të infiltruar, që kishin për qëllim nxitjen e tensioneve dhe dëmtimin e imazhit të tubimit. Ata u distancuan plotësisht nga këto akte dhe rikonfirmuan se do të vijojnë me qëndresën e tyre paqësore deri në plotësimin e plotë të kërkesave dhe largimin e kryeministrit Edi Rama.
Këta persona u identifikuan një ditë më vonë nga mediat me fytyrë dhe emra, ndërsa policia reagoi vetëm disa ditë më vonë.
