I pandehuri në dosjen “Plumbi i artë”, Fatos Gosa, ka mohuar akuzat ndaj tij dhe deklaratat e të penduarit të drejtësisë, Nuredin Dumani. Gosa, gjatë seancës gjyqësore, ka hedhur poshtë çdo lidhje me ngjarjet e përmendura, duke kërkuar vetëm drejtësi.
“Jam kot këtu unë. Ta dëgjojnë të gjithë. Nuk kam lidhje. Nuk e kam takuar askund atë njeri. Vetëm drejtësi dua. Asgjë tjetër. Nuk dua mëshirë. Është gjynah mo!” – u shpreh ai me tone të larta nga kafazi i sallës së gjyqit.
Seanca vijoi me marrjen në pyetje të Nuredin Dumanit nga avokati i Gosës, Përparim Kulluri.
Dumani rrëfeu se ishte plagosur në momentin e arrestimit dhe dha detaje mbi atentatin e dështuar ndaj një personi të njohur si “Oti”. Ai pohoi se kishte shkuar në Elbasan së bashku me Henrik Hoxhën për të kryer vrasjen, por objektivi nuk ndodhej aty.
Sipas Dumanit, Suel Çela kishte dijeni për lëvizjet e tij dhe e kishte futur në pritë. Ai tregoi se kishte komunikuar me Çelën përmes aplikacionit të enkriptuar “Sky” pas atentatit të dështuar.
"Mua më ka nxjerrë në pritë Sueli. Unë kam shkuar atë ditë në Elbasan bashkë me Henrik Hoxhën të vrisnim Ot Kilën. Shkuam me dy makina, por ai nuk ishte fare në Elbasan.
Henriku komunikonte vazhdimisht me Suel Çelën. Unë vetëm pas atentatit i shkruaja. Më pas nuk kam komunikuar më, edhe pse ai ka kërkuar. Do zbardhet Matriksi e do dalin.”
Po, makina që u përdor në vrasjen e Andi Zylyfit ka qenë në garazhin tim. Ishte një makinë që e kishte vjedhur më parë Altin Ndoci. Është përdorur edhe për një ngjarje tjetër në Spitallë. Porositësi ishte Baca, Gim Kabashi. Po, Fatos Gosa ka qenë informator te vrasja e Andi Zylyfit. E kam paguar. Ai informonte me telefon të enkriptuar. Fliste Talo Çela me të.” tha Dumani
I pyetur për bashkëpunimin me prokurorinë, Dumani tha se vendosi të fliste pasi “i ishin hapur sytë”.
Në dëshminë e tij, ai përmendi edhe Talo Çelën, duke thënë se e kishte njohur në vitet 2009-2010 përmes Ilirjan Feçit. Marrëdhënia mes tyre ishte prishur pasi Çela kishte urdhëruar vrasjen e vëllait të Dumanit.
Një tjetër detaj i rëndësishëm në seancë ishte prania e një makine në garazhin e Dumanit, e cila, sipas tij, ishte përdorur në vrasjen e Andi Zylyfit dhe një tjetër atentat në Spitallë, ku porositës ishte Gim Kabashi, i njohur si “Baca”.
Dumani deklaroi gjithashtu se Fatos Gosa kishte qenë informator në vrasjen e Zylyfit dhe se për këtë e kishte paguar. Ai pretendoi se komunikimi ishte bërë përmes një telefoni të enkriptuar, duke ndërmjetësuar Talo Çela.
