Mjekët dermatologë dhe infeksionistë deklarojnë se çdo ditë diagnostikojnë fëmijë dhe të rritur me sëmundjen infektive zgjebe. Madje, bluzat e bardha shprehen se kemi të bëjmë më një epidemi të scabies, pra zgjebes në vendin tonë. Përmes një postimi në rrjetin social "Facebook", doktoresha dermatologe Monika Fida apelon për kujdes të shtuar shëndetësor dhe thirrje për trajtim të rasteve, pasi kemi të bëjmë me sëmundje infektive, vatrat e së cilës mund të jenë kudo: në shkolla, në çerdhe, punë e kafe. " Scabies kërkon vëmendjen tonë pasi rastet e rezistencës ndaj mjekimit janë një emergjencë globale, raportuar nga shumë kolegë Dermatolog në botë. - Po si janë statistikat sot në Shqiperi ? - Jemi në gjendje të një epidemie !!! - Për vetë faktin që nëse unë vetëm sot kam diagnostikuar dhe trajtuar 6 familje ( minimalisht 4 familjarë ), ju e bëni llogarinë se sa e përhapur është … llogaritni se si përhapet në Kopësht , Çerdhe, e Shkolla si dhe në kolltuqet e kafeneve )… - A komplikohet ? - Po , alergjizohet dhe mund të infektohet ! - Ka impakt të madh në cilësinë e jetës, dhe kosto financiare ! - Diagnostikimi i hershëm, trajtimi i tërë familjes si dhe i personave në kontakt të afërt realizon ndërprerjen e përhapjes"-shkruan doktoreshë Fida. Aktualisht raportohen me dhjetëra fëmijë edhe pse të sëmurë me zgjebe vijojnë frekuentimin normal të shkollave, çerdheve dhe kopshteve duke u bërë vatër infektive për gjithë të tjerët . Ndërkohë që as Ministria e Shëndetësisë dhe as Ministria e Arsimit nuk kanë bërë asnjë komunikim mbi situatën apo kujdesin që duhet të tregojnë stafet akademike dhe prindërit.
