I veshur si polumbar, Armandi Nelaj, biznesmen i njohur në Sarandë u nis më 24 qershor të këtij viti nga plazhi nr.1 me një gomone të vogël në drejtim të Portit të qytetit, ku kishte planifikuar të vendoste një sasi eksplozivi të telekomanduar në një anije të linjës Sarandë-Korfuz.
Por rrugës dyshohet se lënda plasëse shpërtheu aksidentalisht për shkak të një gabimi në celularin e vendosur në kallëpin e tritolit. Armandi Nelaj u plagos rëndë.
Ai u nxor në bregun e detit nga turistët, por më pas ndërroi jetë për shkak të plagëve të marra. Viktima u identifikua në morg nga vëllai i tij zyrtar shtetëror.
Një e muaj e gjysmë pas kësaj ngjarje që tronditi Sarandës. Policia njoftoi këtë të hënë se ka hedhur dritën mbi ngjarjen e rëndë dhe ka arrestuar një të dyshuar.
Nga hetimet rezultoi se Nelaj kishte planifikuar shkatërrimin me tritol të anijes ‘Finikas Lines’ të linjës Sarandë Korfuz, për shkak të përplasjeve për konkurrencën që kishte me Andrea Qirjakon. Për të thurrur planin që i mori jetën, 52-vjecari sipas policisë kishteg bashkëpunuar me mikun e tij Erdion Muho, 35 vjec, i cili përfundoi në pranga
Nga hetimet rezultoi se Muho, pronar i anijes “Saranda Express” që operon linjën Sarandë-Korfuz dhe agjencisë “Erdano Tours” bashkë me Armando Nelaj, do t'i vendosnin një anijeje një sasi eksplozivi, që shpërtheu aksidentalisht duke shkaktuar vdekjen e 52-vjeçarit.
“Ky shtetas dyshohet se në bashkëpunim me shtetasin Armandi Nelaj kishin planifikuar vënien e një sasie eksplozivi te njëra nga anijet që operon në linjën Sarandë-Korfuz, për motive konkurrence. Kjo sasi lënde plasëse ka shpërthyer aksidentalisht, gjatë tentativës për ta transportuar dhe vënë në anije, dhe si pasojë ka humbur jetën shtetasi Armandi Nelaj”, njoftoi policia.
Kjo nuk është hera e parë që biznesmenë të ndryshëm përplasen për shkak të konkurrencës. Lufta per kontrollin e Portit vijon prej 3 dekadash dhe ndër vite janë shkaktuar viktima dhe të plagosur.
Një nga shpërthimet që tronditi vendin, ai ishte me eksploziv ne tragetin “Violeta” në shtator 1998. Një muaj pas kësaj ngjarje, u zbulua një mine antitank në tragetin Mimoza.
Po në të njëjtin target në 1998 një polumbar zbuloi 5 kallëpe tritoli gati për të shpërthyer.
Në 2001 ndodhi shpërthim në tragetin Violeta në Korfuz, me një të vrarë dhe një të plagosur.
Për motive konkurrence u dhunua pranë banesës pronari i linjes se trageteve “Finikas Lines”, Andrea Qirjako, ndërsa në maj 2024, u shkrumbua trageti Santa dhe dyshohet se ishte zjarrvënie e qëllimshme.
