Nga VNA.al
Pasi ranë dakord për gjoja Reformën Zgjedhore për të mbyllur listat, PS dhe PD kanë arritur një tjetër pakt këtë herë për të vënë nën kontroll KLSH.
Në seancën e sotme, Kuvendi miratoi thuajse pa zhurmë politike dhe mediatike ngritjen e Komisionit për mbikqyrjen e Kontrollin e Lartë të Shtetit. Ky komision si rrallëherë u votua me 90 vota pro, 1 abstenim dhe 4 kundër.
Përbërja e tij do të jetë e ngjashme me dy Komisionet Hetimore që mazhoranca ja bëri “dhuratë” opozitës në këmbim të fikjes së flakadanëve në Kuvend. Kryetari i komisionit do të jetë nga PD, ndërsa shumicën e anëtarëve do ta ketë PS. Thënë ndryshe, demokratët do të drejtojnë atë që do vendosë shumica socialiste. Pjesë e këtij Komisioni do të jenë, drejtuese Emilia Koliqi (PD), nënkryetare Eslenvera Zake (PS), ndërsa anëtarë do jenë Alban Xhelili (PS), Pranvera Resulaj (PS), Sorina Koti (PD).
Qëllimi i këtij komisioni nuk mund të fshihet pas artificave të të dy palëve për të vënë nën kontroll dhe presion KLSH. Kjo u duk qartë dhe në mbledhjen e ditës së martë të Komisionit të Ekonomisë, ku drejtuesi i këtij komisioni, Eduart Shalsi, thirri për herë të katërt kreun e KLSH, Arben Shehun duke i kërkuar llogari pse ky i fundit kishte kapur në shkelje dhe kërkonte shkarkimin e drejtoreshës së Buxhetit në Ministrinë e Financave, Mimoza Dhëmbin. Madje në mënyrë të jashtëligjshme, Shalsi ftoi në komision për t'u justifikuar Mimoza Dhëmbin, gjë që nuk ka ndodhur kurrë në raste të ngjashme.
Në mënyrë gati injoruese dhe poshtëruese, Eduart Shalsi e trajtoi kreun dhe përfaqësuesit e KLSH si vartës të tij edhe në rastin e raportimit për skandalin e ushqimeve te kontaminuara të AKU apo dhe të institucioneve të tjera.
KLSH nuk është institucion i pakritikueshëm. Qasja për problematika dhe çështje të veçanta kanë shkaktuar jo pak polemika. Megjithatë puna e KLSH është e padiskutueshme në raste si inceneratorët apo skandale të tjera. Ku akuzat e derimëtanishme të SPAK për zyrtarë të lartë janë bazuar dhe në raportet e këtij institucioni.
Mesa duket vendosja e KLSH nën hyqmin e mazhorancës është hapi i rradhës drejt uzurpimit të kompetencave të Institucioneve të pavarura dhe atyre të drejtësisë. Jo më kot Komisioni i Posaçëm që drejtohet nga Fatmir Xhafa dhe që ka në plan të kontrollojë punën e SPAK, ka nisur nga puna duke i lënë bosh por të “ngrohta” vendet e deputetëve të opozitës.
Me gjasë, pas konsensusit për aministinë edhe të të dënuarve nga Gjykata e Posaçme, pseudoreformës dhe listave të hapura, komisionit për kontrollin e KLSH, në shtator pritet të nisë angazhimi dypalësh dhe konsensual PD-PS për të kontrolluar SPAK.
E gjitha mund të konsiderohet “normale” kur organizohet dhe zbatohet nga një mazhorancë e korruptuar. Por kur në këtë proces bashkon votat dhe opozita, atëherë diçka nuk shkon vërtet mirë për shqiptarët./VNA.al/
