Ministria e Mbrojtjes informon mbi situatën aktuale të krijuar nga moti i keq në vend. Reshjet e dendura të borës dhe shirat kanë shkaktuar bllokime të disa akseve rrugore dhe vështirësi në transport.
Gjendja në akset rrugore:
•Dibër: Rruga e “Arbrit” është e pakalueshme për shkak të borës. Disa qendra administrative, përfshirë Lurën, Selishtën, Luzninë, Kalën e Dodës dhe Zall Dardhën, janë të bllokuara.
•Bulqizë: Njësitë administrative Ostren dhe Trebisht janë të izoluara.
•Klos: Rrugët dytësore drejt Suçit, Gurit dhe Xibrit janë bllokuar.
•Mat: Disa fshatra që lidhen me qendrat administrative Macukull, Lis, Derjan dhe Komsi janë të bllokuara.
•Krujë dhe Tiranë: Aksi Cudhi Kamp-Qafështamë dhe rruga drejt Shëngjergjit paraqesin vështirësi për shkak të dëborës.
•Vlorë: Niveli i ujit në rrugët e qytetit është rritur, duke shkaktuar vështirësi në qarkullim.
Rekomandime: Ministria e Mbrojtjes u bën thirrje qytetarëve të përdorin goma dimërore, të lëvizin me kujdes dhe të respektojnë sinjalistikën rrugore.
Situata në porte:
•Në portin e Durrësit, lundrimi i anijeve të vogla dhe trageteve të linjës Durrës-Bari-Durrës është ndaluar.
•Në portin e Vlorës, nuk janë raportuar probleme për lundrimin e anijeve.
Gjendja e lumenjve dhe rezervuarëve:
Lumenjtë dhe rezervuarët janë brenda kuotave normale dhe nuk paraqesin rrezik për përmbytje.
Parashikimi i motit:
Sipas Institutit të Gjeoshkencës dhe Shërbimit Meteorologjik Ushtarak, reshjet e dëborës do të përfshijnë zonat Veriore, Verilindore, Qendrore dhe Juglindore gjatë pasdites dhe ditës së nesërme. Temperaturat do të ulen ndjeshëm, duke arritur:
•Bregdet: 5° / 12°C
•Zona të ulëta: 5° / 10°C
•Zona malore: -4° / 4°C
Era pritet të fryjë e fortë në veri dhe bregdet, ndërsa ngricat mund të krijojnë vështirësi në transport. Strukturat përkatëse janë në gatishmëri për të menaxhuar çdo situatë emergjente.
