Kreu i Partisë së Lirisë Ilir Meta ka publikuar sot episodin e parë të podcast-it të tij "Podcasti i Lirisë". Nga kampingu veror i të rinjve të Partisë së Lirisë në Jalë, Meta e cilësoi podcast-in një eksperiencë të re dhe një formë të re komunikimi. I pyetur mbi përfshirjen e tij në politikë ai u shpreh se ka qenë diçka spontane. "Ëndrra ime ishte të bëhesha pedagog, por ashtu ndodhi". Ish kreu i LIS-së e pranon me krenari krijimin e kësaj partie: "Një tjetër arritje ishte që unë krijova LSI, sepse PS e kishte bllokuar integrimin dhe unë vendosa një bast të fortë. Edhe pse kisha një parti të re nuk e vendosa veten time listë, por thashë unë jam nën mazhoritar dhe nëse populli i Skraparit nuk më voton nën mazhoritar nuk kam pse shkoj në Parlament. Fitorja në Skrapar ishte bindëse dhe ishte një fitore personale". I pari që hapi siparin e komunikimit përmes podcast-eve ishte kreu i qeverisë, z.Edi Rama me "Flasim". Në formatin e tij, kryeministri është drejtuesi teksa përballë qëndrojnë të ftuar nga fusha të ndryshme të jetës. Pas Edi Ramës edhe Sali Berisha publikoi podcast-in e tij "Jeta përtej politikës". Asokohe, kreu i PD akuzoi Ramën se i kishte vjedhur idenë të cilën e mbante prej kohësh në sirtar. Teksa premtoi se do të ishte një dritare e re komunikimi e përjavshme, në fakt Berisha prej kohësh nuk bën më asnjë komunikim me podcast. Mesa duket kjo dritare aktualisht është e mbyllur. Përfshirja e politikanëve në këtë formë të re komunikimi vjen vetëm një vit para zgjedhjeve të përgjithshme që pritet të mbahen në vitin 2025.
