Partia e Lirisë ka njoftuar një protestë për datën 6 dhjetor, në orën 12:00, para selisë së SPAK, pas arrestimit të kryetarit të saj, Ilir Meta, më 21 tetor. Meta përballet me tre akuza të ngritura nga SPAK, duke përfshirë abuzimin me pushtetin si ish-ministër i Tregtisë dhe Energjetikës. Sipas SPAK, Meta ka përdorur autoritetin e tij për të ndërhyrë në procesin e lidhjes së kontratës mes “Debt International Advisory” dhe CEZ Shpërndarje, duke krijuar përfitime të paligjshme.
Gjithashtu, SPAK akuzon Metën për shkelje në lidhje me kontratat e lobimit në SHBA, ku një shumë prej 463,546.26 USD, e financuar nga transferta të dyshimta dhe jo nga llogaritë e Lëvizjes Socialiste për Integrim, nuk është pasqyruar në bilancet zyrtare të subjektit politik.
Akuzat përfshijnë edhe financimin e blerjes së një apartamenti, ku SPAK pretendon se 310,000 euro janë paguar cash nga nëna e zonjës Kryemadhi, duke shmangur deklarimin si dhe mospasqyrimin e shpenzimeve mjekësore të çiftit Meta, që kapin vlera mijëra eurosh.
