Kryeministri Edi Rama, gjatë një fjalimi të mbajtur nga Londra, ka theksuar transformimin e imazhit të Shqipërisë në dekadën e fundit. Ai tha se vendi, dikur i njohur për keqqeverisje dhe probleme të mëdha, është kthyer në një simbol krenarie në arenën ndërkombëtare. Megjithatë, Rama pranoi se Shqipëria nuk është pa probleme, duke bërë thirrje për vijimin e reformave dhe vetëdijen për të përmirësuar të metat ekzistuese.
Rama ironizoi kundërshtarët politikë, duke e quajtur liderin e PD-së, Sali Berisha, “Sudja e plakur që ulërin nga maja e pallatit”, ndërsa partitë e vogla i përshkroi si “Sudja që vjen vërdallë”. Ai theksoi se pa reformat e mazhorancës aktuale, Shqipëria nuk do të kishte një sistem drejtësie të reformuar dhe një luftë të suksesshme kundër korrupsionit pa dallime partiake.
Thirrje për investime nga diaspora
Kryeministri i ftoi emigrantët shqiptarë në Britani të investojnë në vendin e origjinës, veçanërisht në zonat malore dhe truallin e të parëve. Ai njoftoi një iniciativë për t’i lehtësuar investimet në këto zona, duke hequr taksat për 10 vjet për ata që krijojnë agroturizëm dhe zhvillim ekonomik në këto rajone.
Vota e diasporës për zgjedhjet e 2025-ës
Rama kërkoi votën e emigrantëve për zgjedhjet e ardhshme parlamentare, duke theksuar rolin e tyre të rëndësishëm në ndërtimin e një Shqipërie më të mirë dhe më të respektuar në sytë e botës. Ai u shpreh se vota e tyre është thelbësore për vazhdimin e reformave dhe integrimin e Shqipërisë në Bashkimin Europian.
“Flamuri ynë kombëtar do ngrihet si i barabartë mes të barabartëve në BE,” përfundoi Rama, duke theksuar se synon ta bëjë Shqipërinë një burim krenarie për të gjithë shqiptarët, kudo që ndodhen.
