Fatmir Mediu i është bashkuar radhës së kryetarëve të opozitës që kritikojnë publikisht SPAK-un. Gjatë një deklarate, ai komentoi vendimin e Gjykatës Kushtetuese për ish-kryeministrin Sali Berisha, duke thënë: “Ne jemi Republikë Parlamentare, jo Republikë Spak-ore e Kryeministrore.”
Megjithatë, përtej mbrojtjes së Berishës, Mediu duket se ka një shqetësim personal lidhur me dosjen e Gërdecit, për të cilën është nën hetim. Ai e cilësoi rihapjen e saj si të paligjshme dhe tha:
“Po bëhet një gjykim i cunguar. Kam kërkuar që të thirren si dëshmitarë figura të rëndësishme, përfshirë ish-sekretarin e Mbrojtjes së SHBA, por këto kërkesa janë refuzuar. Ky është një proces politik me qëllim zvogëlimin dhe izolimin e opozitës.”
Në të njëjtën kohë, Mediu komentoi edhe për zgjedhjet në Shqipëri, duke theksuar mungesën e një reforme zgjedhore të plotë që të reflektojë rekomandimet e partnerëve ndërkombëtarë dhe OSBE/ODIHR.
Por deklaratat e tij për reformën zgjedhore duken kontradiktore, pasi Mediu është pjesë e koalicionit me Partinë Demokratike të Sali Berishës. Pikërisht PD-ja dhe PS-ja u akuzuan për dështimin e Komisionit të Reformës Zgjedhore, duke injoruar rekomandimet ndërkombëtare dhe duke mbajtur listat e mbyllura për deputetët.
Në vend që të shprehë pakënaqësitë në studiot televizive, Mediu mund të kishte ngritur këto shqetësime në takimet me aleatin e tij Sali Berisha. Të tjerat janë shmangie përgjegjësie dhe retorikë boshe publike.
