Lulzim Basha, kreu i Partisë Demokratike-Demokratët Euroatlantikë, ka reaguar pas përplasjeve mes shqiptarëve në takimin e kryeministrit në Londër. Ai ka akuzuar Edi Ramën dhe Sali Berishën për nxitjen e dhunës, duke thënë se brenda vendit bëjnë pazare mes tyre, ndërsa jashtë vendit shkaktojnë përplasje. Sipas Bashës, veprimet e tyre dëmtojnë shqiptarët dhe përçajnë komunitetin.
Reagimi i plotë i Lulzim Bashës:
Turp e faqja e zezë për Edi Ramën e Sali Berishën. Në Shqipëri bëjnë pazare me njëri-tjetrin për interesa të tyre dhe jashtë vendit, siç ndodhi sot në Londër, nxisin dhunë e përplasje mes shqiptarëve.
Ata kanë interes vetëm pushtetin e tyre të cilin e duan me çdo çmim edhe mbi gjakun e shqiptarëve me shpresën se do t’i shpëtojnë llogaridhënies para ligjit. Pamjet e sotme të përplasjes mes shqiptarëve në Londër janë drithëruese. Këto pamje të shëmtuara duhet të marrin fund dhe shqiptarët të ndërgjegjësohen që të mos përdoren si mish për topat e pushtetit të Edi Ramës dhe Sali Berishës.
