Gjatë takimit të kryeministrit Edi Rama me shqiptarët e Britanisë së Madhe në Londër, kanë ndodhur incidente të shumta. Sipas raportimeve, qytetari Ilir Meshi, i cili brenda sallës akuzoi kryeministrin si “hajdut”, është dhunuar rëndë nga rojet e sigurisë së ngjarjes. Dëshmitarët pranë tij pohojnë se ai është goditur me mjete të forta, përfshirë shufra hekuri, nga persona që pretendohet të jenë pjesë e sigurisë së organizimit.
Incidenti nuk ka prekur vetëm Ilir Mëshin. Mësohet se katër persona, mes tyre një fëmijë i mitur, janë dhunuar nga një grup prej 15 personash që, sipas dëshmitarëve, kanë sulmuar protestuesit në mënyrë të organizuar.
Protestë u zhvillua jashtë godinës ku po mbahej takimi. Protestuesit denoncuan shpenzimin prej 25 mijë paundësh për marrjen me qira të vendit dhe shprehën pakënaqësitë e tyre ndaj qeverisë. Nga ana tjetër, kryeministri Rama, gjatë fjalës së tij, i cilësoi protestuesit si “të verbër të nxitur nga të verbërit në Tiranë.”
Ngjarjet në Londër kanë tensionuar situatën mes shqiptarëve të pranishëm në takim dhe protestuesve, duke nxitur kritika të ashpra për mënyrën e trajtimit të qytetarëve dhe përdorimin e dhunës nga rojet e sigurisë.
