Forcat policore të Durrësit kanë zhvilluar një operacion të gjerë antidrogë në Kavajë, duke çuar në arrestimin e 13 personave dhe sekuestrimin e një sasie të konsiderueshme lëndësh narkotike. Ky aksion, i konsideruar si një nga më të mëdhenjtë e realizuar ndonjëherë në këtë qytet, është zhvilluar në fshehtësi të plotë, pa përfshirjen e efektivëve të Kavajës për të shmangur rrjedhjen e informacionit.
Në operacion kanë marrë pjesë forcat operacionale, antidroga dhe Shqiponjat, ndërsa hetimet janë kryer për muaj me radhë duke përdorur metoda speciale si blerje të simuluara, përgjime dhe vëzhgime. Sipas burimeve nga Policia e Durrësit, deri më tani janë ekzekutuar 13 nga 14 urdhër-arrestet e lëshuara për persona të shpallur në kërkim.
Gjatë aksionit, policia ka sekuestruar qindra doza kanabisi dhe kokaine, duke goditur një rrjet të shpërndarjes së drogës në Kavajë dhe zonat përreth. Ky operacion konsiderohet si një nga goditjet më të forta policore për nga shtrirja dhe intensiteti në këtë qytet.
