Në fshatin e vogël San Agustín del Pozo në Spanjë, mes ndërtesave me tulla të kuqe, ngrihet një kupolë që duket sikur i përket një qendre moderne shkencore.
Por observatori nuk është ndërtuar nga NASA apo ndonjë universitet. E ndërtoi vetë Joaquín Tapioles, një ish-bari 67-vjeçar që astronominë e mësoi vetë dhe që banorët e njohin me pseudonimin “Bariu Galaktik”.
Pasioni i tij nisi kur ishte fëmijë.Tapioles kujton se dilte para agimit për të ndihmuar të atin me delet. Një mëngjes panë një shi meteorësh. Babai i tha se ishin “yje që binin nga qielli”.
Pamja nuk iu nda më nga mendja.
Me kalimin e viteve, ai nisi të mësonte vetë astronominë dhe përfundimisht ndërtoi observatorin e tij, përfshirë një kupolë që rrotullohet. Edhe mënyra si kontrollon teleskopin është e pazakontë: përdor një komandë videolojërash për ta drejtuar dhe për të ndjekur objektet në qiell.
Më 12 gusht, observatori i tij do të bëhet skena e një momenti që ai ka pritur prej vitesh. Spanja do të përjetojë një eklips total të Diellit, i pari i dukshëm nga Gadishulli Iberik që prej vitit 1912.
Megjithëse Tapioles zakonisht e hap observatorin për vizitorët dhe ndan pasionin me të tjerët, këtë herë ka vendosur ta shohë fenomenin vetëm me familjen.
Ka një arsye të thjeshtë: nëse do të kishte shumë vizitorë, ai thotë se do të merrej me teleskopët e të tjerëve dhe do të humbiste vetë momentin.
Në teleskopin e tij mban me krenari edhe një ngjitëse të NASA-s. Tapioles ishte ndër astronomët amatorë që kontribuuan me vëzhgime në misionin Deep Impact drejt kometës Tempel 1 në vitin 2005 dhe mori njohje për kontributin e tij.
Historia e tij është dëshmi se shkenca nuk fillon gjithmonë në laborator. Ndonjëherë nis nga një fëmijë që ruan delet para agimit dhe pyet veten pse “yjet po bien”.
