Protesta kombëtare e opozitës e planifikuar për të shtunën, 8 shkurt, në orën 17:00 para Kryeministrisë ka vënë në gatishmëri Policinë e Shtetit. Partia Demokratike ka kërkuar leje për një tubim tre-orësh.
Gjatë protestës, rrugët që lidhen me bulevardin “Dëshmorët e Kombit” do të bllokohen dhe trafiku do të devijohet. Rreth 1 200 efektivë të policisë, përfshirë forcat e rendit, FNSH, Shqiponjat dhe, në raste nevoje, RENEA, do të jenë në terren për të garantuar rendin. Garda e Republikës do të ruajë institucionet kyçe.
Masat përfshijnë pajisjen e efektivëve me maska kundërgaz, vendosjen e kamerave me rezolucion të lartë për identifikimin e protestuesve të dhunshëm dhe përgatitjen e pesë autobotëve me ujë në rast incidentesh. Policia ka marrë udhëzime të shmangë provokimet dhe të monitorojë individët me histori dhune në protesta të mëparshme.
Në bulevard do të ketë një kordon policor para Kryeministrisë dhe pranë institucioneve si Parlamenti, Bashkia e Tiranës, Ministria e Brendshme dhe selia e Partisë Socialiste. Agjentë civilë do të vëzhgojnë ecurinë e protestës.
