Sot, një muaj më parë, Martin Cani u vra me thikë nga një bashkëmoshatar i tij, vetëm pak metra larg shkollës “Fan Noli” në Tiranë. Një tjetër i mitur, shok me Martinin, mbeti i plagosur në këtë ngjarje tronditëse. Pas ngjarjes, qytetarët kanë zhvilluar disa protesta, dhe pikërisht sot ata u mblodhën sërish për të kërkuar drejtësi për Martinin dhe shkolla më të sigurta për fëmijët. Në protestë morën pjesë edhe prindërit e Martinit, Engjëll dhe Florina Cani. Në fjalën e saj, nëna e Martinit tregoi se gjithmonë e kishte këshilluar të birin për t’u kujdesur. “Në bisedat që bëja me të, i thoja: ‘Martin, kujdes biri im, sepse ka shumë njerëz që nuk duhet t’ua kesh besën.’ As sot nuk e di pse u vra Martini. Fëmija im nuk ishte agresiv, e kam rritur me shumë dashuri. Zgjodha të punoja vetëm 4 orë që të isha pranë tij," tha Florina Cani. Ajo bëri thirrje për drejtësi dhe për përgjegjësi institucionale: “Pse nuk dalin të thonë një fjalë? Kanë kaluar 30 ditë që qaj dhe rënkoj. Kërkoj dorëheqje që të na qetësohet pak shpirti. Po na vrasin çdo ditë e më shumë. S’kam frikë nga askush".
