Gazetarja Blerina Gjoka ka ndarë një reflektim të fortë lidhur me raportin e shoqërisë shqiptare ndaj lirisë së fjalës, duke krahasuar periudhën e komunizmit me realitetin aktual.
Në një reagim të publikuar në rrjetet sociale, Gjoka shkruan:
“Duke punuar me dëshmitë e dokumentet e komunizmit gjatë 7 viteve të fundit, në mënyrë instiktive më vjen një pyetje e brendshme: çfarë do bëje ti po të jetoje në ato vite? A do të kishe guximin t’i kundërviheshe duke thënë mendimin tënd të lirë një regjimi të egër si ai i Enver Hoxhës? Ndërgjegjia ime dëshiron të besojë se po, do e thoja mendimin e lirë pavarësisht pasojave, por se di, kur e vendos veten në vendin e atyre burrave e grave që vërtet guxuan të jenë të lirë aty ku liria nuk kishte kuptim, kupton se duhet të ketë qenë vërtet e vështirë, një veprim vetëvrasës pothuajse. Ky është momenti që i kuptoj dhe masën konformiste të regjimit që nuk e hapte gojën për t’i shpëtuar internimit, burgosjes, gjithçkaje të keqe që vinte me një fjalë goje.”
“Po sot? Në vitin 2025, 34 vite pas rënies së komunizmit? Sot as nuk dua t’i kuptoj e mirëkuptoj njerëzit që kanë frikë të thonë mendimin e tyre se ruajnë një vend pune në shtet, sepse kanë frikë se i vijnë tatimet te biznesi apo se shantazhohen nga i forti politik i zonës. Një frikë e shëmtuar që ka tulatur njerëzit duke kontribuar në tulatjen e shoqërisë ndaj së keqes.”
“Duke shkuar nëpër qytete për reportazhe për fushatën elektorale, has qytetarë që nuk guxojnë të flasin me emër se kanë frikë, apo të tjerë që pasi flasin të kërkojnë që t’ua heqësh citimin se kanë marrë ca telefonata e u është prishur punë. Kjo vetëm sa më mbush me zemërim, nuk mund t’i mirëkuptoj që pranojnë t’i nënshtrohen frikës së pushtetit dhe nuk kuptojnë që pa LIRINË njeriu është një qenie pa kuptim.”
“Për aq kohë sa shoqëria jonë nuk do të kuptojë rëndësinë që ka liria për të menduar, për të folur e për të zgjedhur dhe për ta mbrojtur këtë liri nga çdo kërcënim e për t’ia ushqyer fëmijëve të tyre, ky vend s’ka për të qenë kurrë demokratik e europian.”
Për Blerina Gjokën, kjo frikë është një plagë që po e deformon shoqërinë shqiptare dhe që po pengon ndërtimin e një demokracie të vërtetë. “Pa LIRINË, njeriu është një qenie pa kuptim,” thekson ajo, duke shtuar se pa mbrojtur lirinë e mendimit, të shprehjes dhe të zgjedhjes, Shqipëria nuk do të arrijë kurrë të jetë një vend demokratik dhe europian.
